بیر حیکایه

اورا

اؤلوم ملکه سی اوچ نفر ایدی، سورغوچو ملکه بیر نفر. سونرا دَییشیلدی آمما یئنه بیر نفر ایدی -باشقا بیریسی اولسادا-. بو دَییشمک منیم اوچون نفرت ایله نفرتین دَییشیلمه سی ایدی؛ سومورتقانلیق ایله گولوشون دَییشیسلمه سی اولسادا فرقی یوخ.
اونو گؤره بیلمه یه ایذنیم یوخ دور دئیه سؤزه اینانمیردیم، هر نه یه اَلیم چاتماسادا هر دوشونجه نی دویا بیله جه یم؛ بونا اینانمیشدیم اؤنجه دن. گؤردومده گؤرمه یی ایسته میردیم، گؤرمه مه ییده.
آددیملایا بیله جک یوللار آمما گؤرونمه سین گرک. بو بیر یاسا(گؤزآلتی باخیردیم...)
یاشام کیمیدیر اورا؛ ائله دؤرد یانینی دووارلار بورویوب: گؤرونه ن دووارلار. دئمک اؤزگور یاشام یوخدور بوردا. اؤنومده دوران ساققاللی قایا، مندن اؤنجه اورایا گلمیشدیر. پاسلانیب سینانادکده اوردا قالمالیدیر او. ائوده اولورسا اولسون، و یا دنیزده اوزمک حالیندا گؤرونورسه؛ او اوردا اولان بیریسی کیمی ده گؤرونمه یه بیلیر آمما اوردادیر؛ دنیز اوزو گؤرمور و یاغیشی دویمور.
سونرا قایاسیز یاشامدیر؛ ایکی دونیا آراسیندا اولان بیر یاشام. و بو یاشامدان سنی قورویاجاق آیاق قابیلار، سنین اوچون سورتولمورلر یئرده...
اؤندر یوخ، سوچسوزلوق هتلی و او هتل آرتیق کیفیر و داها بؤیوک؛ بیر دونیا قدرینده، بیر دونیا کیمی...